Pou célébrer l'messe in patois, in étot tertous réunis dins l'églisse Saint-Martin à D'NAIN, y règnot eine atmosphère d'fiête et d'recueill'mint.
Y'avot eine belle crèche dins l'fond, tout près d'l'autel, aveuc MARIE et pis JOSEPH et l'tiot JESUS qui dallot bintôt naître. In étot trinsporté pa l'voix dé ch'curé, l'abbé MARTIN, qui palot patois à l'perfection et pis l'voix d'no abbé TELLE, caute et profonte, y nous inmnott'ent tout près du bon diux.
In étot tertous in parfaite communion et in osmose aveuc tous les patoisants, in avot les iès rivés sur eusses et no orelles grinte ouvert', y disot'tént leu tesque aveuc ferveur, y parlot'tent ed' paix, d'amour, d'justice et tout cha dins l'simplicité, l'plaisi d'déclamer et d'prier leu diux dins not' biau lingache.
L'caleur humaine nous récauffot l'coeur et in n'sintot pus l'frod. In artreuvot l'paix d'no âme et d'no esprit. L'assimblée alle étot aux anches.
J'étos émue jusqu'aus larmes après avoir intindu tous ches récits là dins no biau patois dé ch'nord. In pusse ed' cha ch'atot l'naissance ed' JESUS qu'in proclamot, ch'est vraimint des momints intenses et inoubliapes, des instants marquant qui vous font vous ramintuver les valeurs et pis qu'les humains y sont égaux su l'tierre.
Y'avot aussi l'chorale Josquin DESPRES, mais qui cantot'tént bin et des canchons d'no nord, comme " l'tiot quinquin".
Mi cha m'laich'ra un souv'nir impérissape et pas fauque à mi, mes gins!
In arcomminch'ra l'année qui vient, j'armercie eine masse tous ceusses qui ont participé à l'messe in patois de D'NAIN. A la r'voyure.

 ANNIE BACOUET LE 26-12-2007